Was macht eigentlich..Tim Brave

Untenstehend die Geschichte vom Traber "Tim Brave" in original Version, erzählt von Patrick Bischoff:

 

Was macht aigedlig dr Tim Brave - oder s Gschichtli vomene glaine fräche Rössli

 

Voor langer, langer Zyt in Finnland oobe, isch amene waarme Juni-Daag, me sait s sygi dr dritti gsi, e Rössli uff d Wält koo. Das bin yych gsi. Tim Brave haiss y, aber alli saage mer aifach Timi. Jo, ok, wenn y emool Saich gmacht ha, denn het s Mami mit strängem Wiehre "Tim Brave!" grieft. Aber y ha jo nit vyyl Saich gmacht. Y bin e neugyyrige, fräche Bueb gsii (ups, jetz ha my glaub e bitz verrote, psst...) und am liebschte bin y dr lieb lang Daag uff dr Waid umme gsprunge. Häjoo, doozmool im Joor 1992 het no kai jungs Rössli e Smartphone gha und ummespringe dien jungi Rössli jo schampaar gärn. Und schnäll bin y gsi - ganz bsunders im Drab isch mer kuum en anders nochekoo. Gschwind wie dr Wind...

 

Won y denn e bitz grösser gsi bi, han y iirgend sone glunges Wäägeli griegt. Nit sone grosses schwärs, wie anderi Rössli, wo sy sogar z zwait oder z viert hän miese zie, nai e ganze e lyychts für mii elai. Und mit däm han y denn könne ummedüüse über sone Waid wo rund gsii isch. Das het mer richtig Spass gmacht. Am beschte hets mer gfalle, wenn myni Gspäänli au mit somene komische Wäägeli koo sinn und mer geegenenand hän könne e Wettrenne mache. Doo het my denn allewyyl dr Eergyz paggt! Und maischtens han y au gwunne.

 

E baar Joor spöter, y bi dört fümfi gsii, isch für mii e neus Abenthür koo. Y haa nämmli e neus Dehai in dr Schwyz bikoo. My Cheff isch dört dr Werni Bischoff gsi und syni glai Dochter, d Carole, isch my immer wiider ko bsueche. Ganz in dr Nöchi vo Basel han y gwoont und iirgend öbbis mit "Stall drei W" isch mer emool gsait worde. Was das gnau bedütet, han y nit ganz usegfunde, aber das blaue Hemmli mit em rote Härz druff isch no schön gsi. Bald han y denn au in dr Schwyz dörfe an e Wettrenne goo. Uff em Schänzli isch mys erschte in dr Schwyz gsi, am 13. Juli 1997, und das han y denn grad schnäll gwunne. Amene andere Dag, y waiss nüm gnau wenn das gsii isch, bin y noch Dielsdorf an e Renne gfaare worde. Do bin y schone bitz nervös gsi. Im Renne han y alles gää und bi im Ändspurt so schnäll gsprunge, wien y haa könne. Aber dää näbe mir, dä fräch Siech,  het syni Nase aifach e bitz wyter füüre gstreggt, do bin y halt numme zwaite worde. Y ha däm denn scho gsait, dass mer doo none Revance mache. Y waiss aber nüm, öb mer is nomool imene Wettrenne droffe hän.

 

Scho e Joor spöter het mer denn immer wiider s Chnü wee gmacht, wenn y brobiert ha voll z springe. Arthrose sygi dr Grund, dass es wee macht. Derbyy han y jo nie sone Arth-Rosebusch gfrässe, aber wee hets halt glyych gmacht und drum hets ghaisse y dörfi kaini Wettrenne me mache. Do bin y schone bitz druurig gsi. Aber s het au öbbis guets gha, d Carole isch jetz nämmli no hüffiger zue mir ko. Sii syg jetz myni Chefin und das het mer gfalle. E sone Wägeli han y immer no und jetz düüse mer halt amme duur e Wald. Oder sy nimmt dr Sattel und rytet uff mer - zem Glügg isch sy nit sone schwäri.

 

Aimool isch no luschtig gsi, do isch dr Brueder vo dr Carole, dr Patrick, koo und het my uff e langi Faart mit gnoo. Dört han y denn e Westernsattel uff e Rugge bikoo und äär isch e bitz gspässig aagleggt gsi, mit eme grosse Huet und Stiifel, so wie die im Färnse, wo mängisch die Kieli yyfange. So komischi Stärnli an de Stifel het er no gha - han em denn scho gsait, wenn d my mit dääne stupfsch, denn schiess dy drab - het er aber nit gmacht. S isch dört uff em Gurte oobe nämmli e Pokerturnier gsi und do han en dörfe aane bringe. Lägg hän die andere grossi Auge gmacht, wo mir do zämme zryte koo sinn. Und wäärend dr Patrick am spiile gsi isch, het my d Carole ghoolt und mer sinn aifach gange, do het er nohär alles sälber dörfe hai laufe.

 

Gfreut han y my denn, won y d Anja kennegleert ha. D Anja isch d Dochter vo dr Carole und sy isch jetz scho vieri. Und jetz isch nämmli sii myni Chefin! Wenn d Carole öbbis sait, lueg y jetz immer zerscht zur Anja, öb y das denn au wiirglig mache mues joo, mängisch dörf d Carole au none Helfti vo mir haa und yych freu my, wenn y mit myne baide Maitli darf Zyt verbringe - usser wenn sy my mit Fötteli närvt denn nit! Aber sunscht freu yych my über jeedi Stund, won y mit ene verbringe dörf und mer zämme duur e Wald düüse.

 

Y hoff euch het mys glaine Gschichtli gfalle und kömmet my doch emool ko bsueche

 

Euche Timi 

 

Hier die Geschichte noch als Audio Datei zum Hören

 

Tiim Brave

 

 

Timi

 

Tim Brave

 

Tim

 

T

 

Sdfsdf